Sabtu, 15 Desember 2012

NOSTALGIA DARI PADANG

Nampaknyo balanjuik carito lamo ko baa suasana manonton jaman dulu (jadul) katiko ambo masih kelas satu SMP dan masih basirawa pendek tahun 1977 sampai 1979.Rato-rato jaman tu anak-anak sakolah banyak juo nan candu manonton pilem Kung Fu, memang pilem itu bana nan sadang-sadang booming dibioskop-bioskop di kota Padang nan tapusek di daerah pondok, sarupo Bioskop Karya, New Rex, Satria dan Purnama.Ambo salah satu anak ketek katiko tu nan sabana candu jo pilem Kung Fu ko atau istilah dulunyo pilem Cino mangamuak, mungkin dek rato-rato lakon ko di pilem Kung Fu ko acok dipasamoan katiko bacakak amuah gai sorang lawan 50 urang labiah, Nan 50 urang ko tantu urang cino, jadi yo itu tadi mangamuak inyo malawan lakon, Tantunyo nan lakon indak buliah kalah apolai mati, paralu bana sutradara manjago nyawa lakon ko mah..kok diatur mati duluan tantu abih pilem ko lai. Nan masih takana bana dek ambo pilem kung fu nan cukuik heboh dan sambuah bagadincik urang maontonnyo ka Bioskop katiko itu pilem kung fu nan bajudul Temple of Shaolin bintang utamonyo Fu Shen dan Cang Kuang Tai. Iko tamasuak salah satu pilem kung fu klasik sepanjang jaman. Nan masih juo ingek dek ambo sampai kini Fu Shen ko latihan di kuil shaolin ko sabalun pai malawan bandit (bandit ko nan jaek-jaek di pilem, kalo nan elok-elok namonyo lakon) inyo marandang tangannyo jo kasiak Angek dalam kuali, jadi kok salasai kaji ilmu maawai-awai kasiak angek dalam kuali satiok lawan kanai tapak tangannyo lansuang takongkang mati badarah-darah dimuluik. Kalau indak salah..Fu Shen ko lakon nan dikorban sutradara..alias diakhir episode inyo mati, tapi jasonyo mambunuah bandit banyak bana di pilem tu.

Nah katiko pilem ko sadang angek-angek diputa di bioskop di Padang, yo ambo alun bisa manonton lai partamo tantu karicinyo maha dan jam mainnyo malam hari, aia tawa ka pondok tu taraso jauh dan langang mah kok lah malam hari, iyo gamang kok abih manonton tu pulang ka aia tawa, maklum masih ketek basirawa pendek takuik di ladiang dek urang gilo tantunyo nan baok ladiang.

Kesempatan manonton pilem kung fu tu tibo juo, biasonyo ambo jo kawan-kawan sakolah dan anak-anak aia tawa manonton siang hari atau istilahnyo ekstra siang, bioskop favorit kami adolah Satria, iko lai manenggang arago karcisnyo dan bisa ditoleran anak-anak manonton 2 karicih masuak tigo urang.

Jam main pilem ekstra siang ko partamo jam 10, kaduo jam 12 kok maledak pilem dan animo masyarakat tinggi lo batambuah jam 2, kami maambiak manonton nan jam 2, dari aia tawa kami barombongan naik oto citi ekpres ka terminal Goang Hoat Pasa Raya, dari terminal tu kami bajalan kaki ka bioskop satria karano pertimbangannyo bia himaik piti kok naik bendi lo tantu banyak lo kanai kami dan juo jalan dari terminal ka bioskop tu jaman dulu dakek sajo taraso.

Tibo di bioskop urang lah rami ka manonton, panjang antrian tiket. lah kami utus sorang kawan kami antri untuak mambali karcis. Piti pambali karcis kami baiyua-iyua untuak duo karcis yang kami bali mako nan masuak tigo urang. Samantaro kami nan indak ikuik antri lah sato lo bagidincik dimuko kotak kaco nan ado babarapo poto nan ditempe adegan-adegan nan seru dipilem nan ka ditonton atau istilah lainnyo mancaliak klise dulu.

Karicih lah ditangan, kami bapacik-pacik tigo urang untuak duo karcis lah sato lo kami antri masuak. Banyak juo anak ketek sabaya kami nan marengek minta masuak "Da..da..ikuik masuak ciek da" inyo manyapo urang gadang nan manonton baduo, tantunyo bisa lo inyo ikuik mode karcis kami duo batigo" Tu ado lo anak ketek nan lain maibo-ibo minta masuak "Pak..Pak..ajak lah awak masuak ciek" ka apak-apak nan baduo bakawan manonton. "Pacikan sajo tangan ambo PaK", kadang-kadang bujuak rayu maibo-ibo ko lai didanga dek uda-uda dan apak-apak tu, inyo baok lah anak ketek sabaya kami ko masuak.

Tibo ditukang cabiak karici "Ma karici waang" kami agiagkan duo karici tapi tigo nan masuak, biasonyo lai ditoleran dek tukang karici ko atau lah lazim salamoko untuak anak-anak ketek cando kami manonton bisa duo karici untuak batigo. "masuak..masuak..lah"

Lah lapeh kami di dalam bioskop ko, cari tampek duduak, nan ambo labiah suko duduak di gang diantaro sayok suok jo kida kursi nan bajanjang semen, lai agak lapang iko tampek ilia mudiak urang manggaleh didalam bioskop baa kecek si Ab sorak urang ko "rokok..rokok...aia..aia..karupuak {ShowGlossar:180}..karupuak jariang..limau..limau..paragede..paragede" Ambo trauma duduak dikursi bioskop nan dari rotan bajalin tu, masalahnyo ambo sadang manonton di bioskop Satria ko ado kursinyo nan bakapindiang, sadang main pilem paho ambo digigiknyo, kok lah digigik kapindiang onde marasai awak deknyo, padiahnyo yo manggigik bana tu gata-gata, kalua manonton paho ambo lah sambok merah-merah.

Nan pononton lah bajibun, lai ado juo nan bisa duduak dima sajo duduak panonton ko, dilantai, sayo suok dan kida, digang dima sajo nan pantiang bisa manonton. Iyo angek basangai manonton dihari siang tu dalam bioskop, lah basah baju dek karingek. "Puta lah lai pilem tu Incekkkkkkkkkkkkk" itu sorak partamo tentang incek ko..beko adolai mah..sorak incek..nan bergema.Incek ko dek rato-rato nan punyo bioskop di Kota Padang urang cino, jadi iko caro maimbau nan "bersahabat" bagi urang cino di kota Padang "Incek"

Layarlah dibuka pintu lah ditutuik suasana lah galok, lampu dimatikan, dari ateh balkon lah kalua sinar manembak layar tando pilem ka diputa. Dilayar muncul selamat datang di bioskop satria, tu lanjuik mohon matikan api rokok anda, dilarang merokok dalam bioskop" peringatan ko masuak talingo suok kalua ditalingo kida dek panonton. Tiok suduik manggabubu asok rokok, nan panggalehpun bantuak itu basorak Rokokkkkkkkkkkk...Rokokkkkkkkk !!!. Sabalun pilem nan ka ditonton di puta biasonyo ado diputa promosi pilem-pilem nan kadiputa minggu salanjuiknyo, penonton dek ka angekan indak sabar manunggu pilem Kung Fu nan sero ko..basorak baliak "Puta lah lai incekkkkk"

Nan incek diateh balkon ko, lah mamuta pilem kung fu ko..lah basorak panonton ko kini indak incek lai soraknyo. Samakin lamo pilem ko samakin sero jo sagalo adegan bacakak ala silek kung fu, tahu-tahu putuih rol pilem ko..krekkkk..krekkk..dilayar cahayo sajo tarang sajo nan tapajang lai...tanpa dikomando panonton ko basorak baliak "Incekkkk..incekkkkk" Nampaknyo incek diateh balkon agak lamo manyambuang pilem ko..panonton labiah padiah lo soraknyo.."Incekkkk..Kapiaaaa" incek kapiaaaa..waang", samakin lamo pilem nan putuih diputa baliak samakin kapia incek ko disorakan panonton walau dilayar lah tatulih permohonan maaf.

Lah main liak pilem ko, mato panonton bantuak kanai hipnotis tapaku mancaliak kalayar tu, indak saketek alahe malengong mancaliak nan lain.Lah salasai sa Roll pilem ko layar tarang panonton basorak uuuuuuuuuuuuu...!!!. Tapaso istirahat dulu manunggu rol pilem kaduo nan biasonyo diambiak di bioskop lain nan sadang mamuta pilem nan samo. Iko kesempatan panggaleh hilia mudiak manyorakan galehnyo. Penonton dek angek raso kanai abuih didalam bioskop muali basorak liak "Incekkkkk..capek puta lai pilem tu"...Incekkkk kapia waaanggg...Incekkkk indak basunek..waang...kapiaaaa....ha..ha yo bananyo..marasai Incek nan dibalkon kanai sorak urang Padang

Akhirnyo main pilem dari rol kaduo ko, tibo-tibo urang batapuak didalam bioskop ko, ahaaa..ruponyo lakon ko sadang diateh angin, lah inyo dongkak tabang, tinju, kuntau, tampeleang pokoknyo jo sagalo jurus kung fu nan rancak-rancak bandit-bandit nan jumlahnyo puluhan urang. Satiok lakon manang ado sajo panonton nan batapuak (ambo lai indak..sarius..he..he)

Pilem ko akhirnyo lah salasai, nan lakon masih iduik lah tahoyong-hoyong baju badarah-darah, muluik co itu lo, kaki lah tengkak, tangan lah bantuak ka patah, tapi nan induak angkang bandit lawan terakhir lah mati. Dilayar kalua tulisan cino tando pilem ko lah salasai..kok pastinyo bana ado tulisan The End. Nan pintu lah dibuka gadang-gadang lah masuak cahayo matohari kadalam bioskop. Tibo dilua ambo lelong bakunang-kunang paniang lalek dek parubahan galok ka tarang nan manyilaukan.

Lah stabil indak lelong lai kami masih bakumpua-kumpua di muko bioskop, banyak juo urang nan habis manonton masih sajo maliek-leik klise nan tapajang "Disiko tadi mah lakon bacakak, wakatu inyo dipasamoan di pasa"..klise nan ko..lakon sadang latihan dikuil shaolin mah"..bamacam-macam komentar urang nan lah manonton pilem ko maliek klise nan tapajang dilua ko.

Salah satu urang nan sato lo mancaliak-caliak klise ko baliak indak labiah indak kurang ambo bana (Si Ab sato lo ndak..ha..ha..ha). Kami barombongan liak pai ka terminal goan hoat pasar raya untuak pulang , sabalunnyo kami minum aia tabu kok ndak aia cincau dingin, onde..yo sajuak karangkuangan dek nyo, iyolah mah didalam bioskop kami raso kanai abuih dek angeknyo tantu auih bana.

Itulah carito wakatu ambo ketek basirawa pendek manonton bioskop jo kawan-kawan nan sacandu jo pilem Kung Fu, baa carito kawan nan lain manonton bioskop jadul lai seru bantuak kami juo.

Salam-Jepe
Carito ko ambo buek lansuang disiko manjalang ambo ka lalok lai di kamar Hotel Surya Duri..Bisuak (Sabtu) ambo pulang ka Pekanbaru

Hik..hik..hik..this night..still rolling on the bed alone...plis de

Tidak ada komentar:

Poskan Komentar